काठमाडौं । नेपाली काँग्रेसका महामन्त्री गगन थापाले आसन्न केन्द्रीय समितिको बैठकमा विभाग गठनको प्रस्ताव ल्याउन सभापति शेरबहादुर देउवासँग आग्रह गर्नुभएको छ ।

विभाग तथा भ्रातृ संस्थाहरू गठन नहुँदा पार्टीलाई परिचालन गर्न कठिनाई भएको उहाँले बताउनुभयो । पार्टीले विधानले गरेको व्यवस्थाको प्रयोग गर्ने सर्वाधिकार सभापतिमा रहेको उहाँले बताउनुभयो ।

सभापतिले विधानलाई कार्यान्वयन नगर्दा कतिपय विषयहरू अड्केका थापाले बताउनुभयो । विधानसंगत कार्य नहुँदा मातहतका कार्यसमितिलाई पूर्ण रुपमा परिचालन गर्न नसकिरहेको महामन्त्री थापाको भनाइ रहेको थियो । महाधिवेशन भएको ६ महिनाभित्र विभाग गठन भइसक्नुपर्ने विधानको व्यवस्था छ । विधान अनुसार २८ वटा विभाग गठन हुनुपर्दछ ।

प्रत्येक विभागमा प्रमुख, उपप्रमुख, सचिव र सदस्यहरु गरी बढीमा ५१ जना हुनेछन् । संघको निर्वाचन भएको ३ महिनाभित्र भ्रातृ संस्थाहरुको अधिवेशन गर्न पार्टीले निर्देशन दिएको छ । तर, भंग भएका १० मध्ये ५ वटा भ्रातृ संस्थाको मात्रै मूल नेतृत्व मनोनित गरिएको छ । मूल नेतृत्व मनोनित गरिएका ती भ्रातृ संस्थाले समेत पूर्णता पाउन सकेका छैनन् ।