काठमाडौं । राष्ट्रिय स्वतन्त्र पार्टी (रास्वपा)ले जिल्लामा जोखिमपूर्ण अवस्थामा रहेको नागरिकको उद्धार कार्यमा सबै तहका सदस्य सक्रिय रहन निर्देशन दिएको छ । अविरल वर्षा कारण देशभर व्याप्त विपद्को परिस्थितिमा रास्वाको संयुक्त बैठकले देशमा आपत परेको बेला आफ्नो लागि युनिफर्म खोजी गर्ने नभई आफुलाई जिम्मेवार नागरिकको रूपमा उद्धार कार्यमा लागी पर्न निर्देशन दिएको हो ।
यस्तै उद्धार कार्यमा संलग्न हुँदा आफ्नो सुरक्षालाई पनि ध्यान दिई, सम्बनिधत सुरक्षा निकायसँग समन्वय गरेर आफुले जानेको र सक्ने तवरले उद्धार कार्यमा लाग्न, सबै जिल्लामा भइरहेको समन्वय र सहयोगको कार्यबारे स्थानीय प्रशासनलाई जानकारी गराउन तथा आफुले गरिरहेको कामका बारेमा सम्बन्धित निकायलाई सूचित गर्ने तर अनावश्यक प्रचारबाजी नगर्न निर्देशन दिइएको पार्टीका कार्यवाहक प्रवक्ता मनिष झाले जानकारी दिए ।
उनका अनुसार उद्धार कार्यको नाममा कसैसँग राहत तथा पैसा उठाउने काम नगर्न नगराउन, जोखिममा परेकाको उद्धारमा सहयोग गर्न र सरकार तथा प्रभावित क्षेत्रमा रहेकाबीच समन्वय गर्न केन्द्र र प्रदेशस्तरमा कल सेन्टर तथा नियमित रूपमा उपलब्ध महत्वपूर्ण सूचना सार्वजनिक गर्न पनि निर्देशन दिएको छ ।
