एजेन्सी। आणविक शक्तिमा अस्थिरता ‘राम्रो कुरा होइन’ भन्दै युरोपेली संघ (ईयू)का शीर्ष कूटनीतिज्ञले वाग्नरको विद्रोहले युक्रेनमा मस्कोको युद्धले रुसी शक्तिलाई विभाजित गरिरहेको देखाएको बताएका छन्।
युरोपेली संघका विदेश नीति प्रमुख जोसेप बोरेलले भने, ‘यो सप्ताहान्तमा जे भएको छ, त्यसले युक्रेनविरुद्धको युद्धले रुसी शक्तिलाई ध्वस्त पारिरहेको छ र यसको राजनीतिक प्रणालीलाई प्रभावित गरिरहेको छ भन्ने देखाउँछ।’
‘रुसजस्तो आणविक शक्ति अस्थिरताको चरणमा जान सक्छ भन्ने कुरा पक्कै पनि राम्रो होइन। यो पनि ध्यानमा राख्नुपर्ने कुरा हो,’ बोरेलले पत्रकारहरूसँग भने, ‘सबैभन्दा महत्त्वपूर्ण निष्कर्ष के हो भने रुसी राष्ट्रपति भ्लादिमिर पुटिनले युक्रेनविरुद्ध सुरु गरेको युद्ध र पुटिनले वाग्नरसँग मिलेर बनाएको अस्वाभाविक गठजोडले पुटिन स्वयंप्रति औँला ठडाएको छ।’
बोरेलले भने, ‘अस्वाभाविक शक्ति संरचनाले आफ्ना सर्जकविरुद्ध काम गरिरहेको छ, राजनीतिक प्रणालीले कमजोरी देखाइरहेको छ र सैन्य शक्ति ध्वस्त भइरहेको छ।’ लक्जेम्बर्गमा भएको आफ्नो नियमित बैठकमा इयूका विदेशमन्त्रीहरू विद्रोहबाट उत्पन्न परिणामको मूल्यांकन गर्दै यसलाई स्वाभाविक परिणाम बताएका छन्।
स्वीडेनका विदेशमन्त्री टोबियास बिलस्ट्रोमले अशान्ति रुसको आन्तरिक मामिला भएको बताए। उनले ‘सबैभन्दा महत्त्वपूर्ण कुरा’ भनेको युक्रेनलाई समर्थन गर्नु रहेको बताउँदै पछिल्ला परिणामले युक्रेनले आफ्नो भूभाग फिर्ता लिन सक्ने पुष्टि गरिरहेको बताए।
