चितवन। कानुन, न्याय तथा संसदीय मामिलामन्त्री धनराज गुरुङले वर्तमान सरकार गठन हुँदाको समयको तुलनामा अहिले धेरै सुधार भएको बताएका छन्। चितवनमा आज आयोजित पत्रकार सम्मेलनमा उनले धेरै सुधार भए पनि मुलुकमा अझै अप्ठ्यारो अवस्था भने कायमै रहेको उल्लेख गरे।

‘वर्तमान गठबन्धन सरकार गठन हुँदा अवस्था निकै चुनौतीपूर्ण थियो। सबैतिर अब नेपाल पनि श्रीलंकाकै पदचापमा जाने भयो भन्ने अवस्थामा थियो,’ मन्त्री गुरुङले भने, ‘हामीहरू मन्त्रीमण्डलमा समावेश भइसकेपछि त्यो अप्ठ्यारो परिस्थितिबाट बिस्तारै ‘ट्र्याक’मा ल्याउँदै छौं। पूरै राम्रो भइसकेको भने छैन।’

केही अप्ठ्यारो परिस्थितिका कारण जनताको चाहनाअनुसार काम हुन नसकेको भनाइ उनका भनाइ थियो। ‘हामीले चाहे जति गर्न सकिरहेका छैनौं मैले स्वीकार गर्छु,’ उनले भने। मन्त्री गुरुङले न्यायालय स्वतन्त्र हुनुपर्नेमा जोड दिँदै न्यायालय स्वतन्त्र छ भन्दैमा न्यायाधीशले आफूखुसी निर्णय गर्न नपाउने बताए।

न्यायधिशहरुले कमी कमजोरी गरे न्यायपरिषद्ले कारबाही गर्ने उनको भनाइ थियो। उनले भने, ‘न्याय सम्पादनमा यदि कमी कमजोरी देखियो र त्यसमाथि केही कुरा जोडिएर आयो भने सरकारले कसैलाई छाड्दैन।’ सहकारी पीडितका विषयमा नेपाल प्रहरीको केन्द्रीय अनुसन्धान ब्यूरोले अध्ययन गरिरहेको बताउँदै उनले दोषी देखिएका सबैलाई कानुनी दायरामा ल्याइने स्पष्ट पारे।

उनले भने, ‘राजनीतिक प्रभावले ठगी धन्दामा लाग्नेलाई सरकारले छोड्ने र छुट दिने गर्दैन।’ फरक प्रसङ्गमा बोल्दै नेपाली काँग्रेसका उपसभापति मन्त्री गुरुङले समुदायमा काँग्रेस अभियानका क्रममा देखिएको निराशाबाट आत्तिनुपर्ने अवस्था नरहेको बताए। उनले भने, ‘लोकतन्त्र मान्ने मान्छे निराश हुने आत्तिने होइन। जनमत परिवर्तन भइरहन्छ।’ राजनीति निरन्तर बग्ने नदी भएकाले उतारचढाव आइरहने भन्दै उनले आत्तिन नहुने बताए।