काठमाडौँ । नेकपा(एमाले)ले प्रचार तथा प्रकाशन विभागमा ३ जना सदस्यलाई मनोनीत गरेको छ। बिहीवार केन्द्रीय कार्यालयमा बसेको पार्टीको सचिवालय बैठकले प्रचार तथा प्रकाशन विभागमा ३ जनालाई मनोनीत गर्ने निर्णय गरेको हो।

महासचिव शंकर पोखरेलले काठमाडौंका मणिराज बाँस्तोला, सिन्धुपाल्चोकका माधव नेपाल र खोटाङका इन्द्र आचार्यलाई पार्टीको प्रचार तथा प्रकाशन विभागको सदस्यमा मनोनीत गरिएको जानकारी दिए। बैठकले आगामी फागुन ८, ९ र १० गते बस्ने केन्द्रीय कमिटीको बैठकका लागि तर्जुमा गर्ने एजेण्डाको सम्बन्धमा पनि छलफल गरेको बताए।

केन्द्रीय कमिटी बैठकमा वर्तमान राजनीतिक अवस्थाको समीक्षा, सांगठनिक प्रतिवेदन र संगठन सुदृढीकरण सम्बन्धी विशेष कार्ययोजना राख्ने तय भएको उनले जानकारी दिए। त्यसैगरी पार्टीलाई अझ व्यवस्थित बनाउने ढाँचाको सम्बन्धमा छलफल गर्ने कुरालाई पनि एजेण्डा बनाइने उनको भनाइ छ।