काठमाडौं । प्रतिनिधिसभा बैठकको शून्य समयमा सांसदहरुले समसामयिक विषयहरुमा सरकारको ध्यानाकर्षण गराएका छन्।

आइतबारको प्रतिनिधिसभा बैठकमा शून्य समयमा बोल्दै प्रतिनिधि सभा सदस्यहरुले विभिन्न विषयहरुमाथि सरकारको ध्यानाकर्षण गराएका हुन्। प्रतिनिधिसभा सदस्य अनिशा नेपालीले सडक दुर्घटना र हवाई दुर्घटनामा निधन हुनेहरुप्रति सरकारले विभेद गरेको बताइन्।

उनले सिमलतालमा बस दुर्घटना हुँदा मन्त्रिपरिषद्बाट शोक प्रश्ताव पारित नगरिएको तर हवाई दुर्घटना हुँदा शोक प्रश्ताव पारित गरी राष्ट्रिय झण्डा झुकाइएको भन्दै यसप्रति सरकारसँग जवाफ माग गरिन्।

प्रतिनिधिसभा सदस्य अमृतादेवी अग्रहरीले देशमा नीति, ऐन, कानूनहरु धेरै भए पनि कार्यान्वयनमा कमी भएको बताइन्। उनले राज्यको तल्लो निकायदेखि माथिल्लो निकायसम्म जहाँ जाँदापनि ऐन, कानुन बाझिएको कुरा आउने भन्दै यसले नागरिकहरु समस्यामा परेका बताइन्।

प्रतिनिधिसभा सदस्य अर्जुननरसिंह केसीले आजसम्म संसदमा कुरा उठाइएका चर्चित भ्रष्टाचार काण्डहरुको निष्पक्ष र पारदर्शी छानविन गर्न सरकारसँग माग गरिन्।

‘संसदमा उठेका र आजसम्मका सबै चर्चित भ्रष्टाचार काण्डहरुको निष्पक्ष र पारदर्शी छानवीन होस्। संविधान संशोधन लगायतका सात बुँदे सहमतिको कार्यान्वयन र दण्डहिनता, भ्रष्टाचार र कुशासनको त्रिदोषबाट थिलथिलो भएको आजको अवस्थाबाट देशलाई उन्मुक्ति दिदैँ आम जनमानसमा देखिएको निराशालाई आशामा बदल्ने काममा यो सरकार सफल होस्।’

प्रतिनिधिसभा सदस्य अशोककुमार चौधरीले नेपालीलाई भुटानी शरणार्थीलाई मन्त्री बनाइएको बताए। त्यस्तै स्काउटको जग्गा हडप्ने र लुम्बिनी प्रदेशमा हत्या आरोपीलाई मन्त्री बनाइएको भन्दै सरकार कुशासनको जगमा उभिएको बताए।

उनले भने ‘कुशासनको जगमा उभिएको सरकारको कर्तुत अहिलेको घटनाक्रमहरुले प्रस्तुत गर्दैछ। स्काउट लैनचौरको जग्गा हडप्नेलाई मन्त्री। सोझासाधा जनतालाई भूटानी शरणार्थी बनाउनेलाई मन्त्री। लुम्बिनी प्रदेशमा निर्मला कुर्मीको हत्या आरोपीलाई पनि मन्त्री। भ्रष्टाचार गर्दैनौँ। भ्रष्टाचार सहदैनौँ भन्ने प्रधानमन्त्रीलाई म निवेदन गर्न चाहन्छु, छानवीनको शुरुवात आफ्नै मन्त्रिपरिषद्बाट गर्ने पो हो कि?’

प्रतिनिधि सभा सदस्य असिम साहले जहाज दुर्घटनासँगै प्राधिकरण, मानविय समवेदना र मिडिया समेत घाइते भएका टिप्पणी गरे। उनले यस अगाडिका कैयौँ दुर्घटनाहरुबाट सरकारले पाठ नसिकेको भन्दै सरकारको सोँच पनि घाइते भएको बताए।

प्रतिनिधिसभा सदस्य कालुराम राईले सडकपेटी खुला राख्नु अपाङ्गता भएका व्यक्तिहरुको ज्यान जाने धराप थाप्नु भएको भन्दै सरकारको ध्यानाकर्षण गराए। उनले सडकपेटीहरुमा रेलिङ बनाउने, र्‍याम्प राख्ने तथा गाइडिङ ब्लक राखी अपाङ्गता पहुँचयुक्त सडक बनाउन माग गरे।

प्रतिनिधि सभा सदस्यहरुले आ–आफ्नो क्षेत्र तथा जिल्लाहरुमा प्राकृतिक प्रकोपका कारण घटनाहरु घटिरहेको भन्दै सरकारको ध्यानाकर्षण गराएका थिए।