काठमाडौँ । न्याय परिषद्ले जिल्ला र उच्च अदालतका ९१ जना न्यायाधीशको सरुवा गरेको छ। परिषद् बैठकले जिल्ला अदालतका ६५ न्यायधीश र उच्च अदालतका २६ न्यायाधीशको सरुवा गरेको हो। एकै कार्यक्षेत्रमा दुई वर्ष बसेका न्यायाधीशहरूको सरुवा गरिएको परिषद्ले जनाएको छ।

परिषद्ले उच्च अदालत पाटनका न्यायाधीश धीरबहादुर चन्दलाई उच्च अदालत जनकपुर राजविराज इजलासमा सरुवा गर्दा उच्च अदालत विराटनगर, ओखलढुंगा इजलासमा रहेका न्यायाधीश लेखनाथ पौडेललाई उच्च अदालत पाटनमा ल्याइएको छ।

यस्तै उच्च अदालत पाटनका न्यायाधीश श्यामजी प्रधानलाई उच्च अदालत तुलसीपुर, नेपालगञ्ज इजलासमा पठाइएको छ। न्यायाधीश प्रधानलाई राजश्व न्यायाधीकरण नेपालगञ्जको अध्यक्ष पदमा तोक्न परामर्श गर्ने निर्णय पनि आजको बैठकले गरेको छ।

उच्च अदालत पाटनका न्यायाधीश जनक पाण्डेलाई उच्च अदालत सुर्खेतमा सरूवा गरेको परिषद्ले न्यायाधीश पाण्डेलाई श्रम अदालतको अध्यक्षमा सिफारिस गरेको छ। यता न्यायसेवा आयोगले दुई सचिवको सरुवा गरेको छ भने दुई सहसचिवलाई सचिवमा बढुवा गर्दै पदस्थापन सिफारिस गरेको छ।

सत्य निरुपण तथा मेलमिलाप आयोगका सचिव उदयराज सापकोटालाई सरुवा गर्दै कानून न्याय तथाा संसदीय मामिला मन्त्रालयमा पठाएको छ भने मन्त्रालयका सचिव फणिन्द्र गौतमको सरुवा प्रधानमन्त्री तथा मन्त्रिपरिषद्को कार्यालयमा गरिएको छ।

आयोगका अनुसार रक्षा मन्त्रालयका सहसचिव आलोकचन्द्र श्रेष्ठलाई बढुवा गरी मेलमिलाप आयोगको सचिवमा पदस्थापन गरिएको छ भने नेपाल कानून आयोगका सहसचिव पाराश्वर ढुंगानालाई सचिवमा बढुवा गरी आयोगमा नै पदस्थापन गरिएको छ।