काठमाडौं । सोलुखुम्बुको खुम्बु पासाङल्हामु गाउँपालिका–४ स्थित थामेगाउँमा आएको आकस्मिक बाढीमा फसेका ६ जनाको उद्धार गरिएको छ । नेपाली सेनाले एक विज्ञप्तिमार्फत उनीहरूलाई शुक्रबार सुरक्षित स्थानमा सारिएको जनाएको छ ।

थामेगाउँमा शुक्रबार दिउँसो पौने २ बजे आकस्मिक बाढी आएको खबर आएपछि सेना उद्धारका निम्ति पुगेको थियो । सेनाले १५ देखि २० घर पुरिएको हुन सक्ने पनि जनाएको छ ।

“थामेगाउँमा करिब १ः४५ बजे हिम पहिरो गएको खबर प्राप्त हुनासाथ नेपाली सेनाको उद्धार टोली परिचालित भई प्रभावित इलाकाबाट ६ जनाको उद्धार कार्य गरेको छ,” सेनाले जारी गरेको विज्ञप्तिमा भनिएको छ, “उक्त पहिरोमा परी १५ देखि २० घर पुरिएको भन्ने बुझिएको ।”

हालसम्म कुनै पनि मानवीय क्षतिको विवरण प्राप्त नभएको सेनाले जनाएको छ ।