भरतपुर। शिक्षा, विज्ञान तथा प्रविधिमन्त्री विद्या भट्टराईले विश्वविद्यालयमा भइरहेको गुण्डागर्दीलाई राजनीतिक संरक्षण नहुने स्पष्ट पारेकी छन्। भरतपुर विमानस्थलमा आज बिहान सञ्चारकर्मीसँग उनले विश्वविद्यालयमा हुने यस्ता गतिविधि नियन्त्रण गर्न आवश्यक रहेको बताएकी हुन्।

उनले त्रिभुवन विश्वविद्यालयमा भएको गुण्डागर्दी नियन्त्रणका लागि नै गृहमन्त्रीसँग सुरक्षा मागेको उल्लेख गरिन्। ‘विश्वविद्यालयमा राजनीति नभई गुण्डागर्दी भएको हो,’ मन्त्री भट्टराईले भनिन्, ‘हरेक क्षेत्रमा गृह मन्त्रालयले सुरक्षा दिने भएका कारण गृहमन्त्रीसँग सुरक्षा मागिएको हो।’

विश्वविद्यालयमा गुण्डागर्दी र अपराधिकरण स्वीकार्य नभएको उल्लेख गर्दै उनले भने, ‘गुण्डागर्दी र अपराधिकरण चरित्र हो। त्यस्ता प्रवृत्तिविरुद्ध सुरक्षा माग गरिएको हो। यस्ता गतिविधिमा राजनीतिक संरक्षण हुनु हुँदैन।’ मन्त्री भट्टराई नवलपुरमा हुने कार्यक्रममा सहभागी हुन यहाँ आएकी हुन्।