मेलवर्न । अष्ट्रेलियामा नेपाल कृषि, वन तथा वातावरण संघ (नेपाफ)ले नेपालको सुदूरपश्चिम विश्वविद्यालय, कृषि तथा कृषि तथा वनविज्ञान संकाय, कलेज अफ नेचुरल रिसोर्स एण्ड म्यानेजमेन्ट टीकापुर क्याम्पसका संकाय सदस्यहरूलाई अनुसन्धान क्षमता अभिवृद्धि गर्ने उद्देश्यले एक अभिनव तालिमको आयोजना गरेको छ ।
सीप र ज्ञान साझेदारी पहल अनुसन्धान पद्धतिका विभिन्न पक्षहरूमा केन्द्रित रहेको उक्त तालिम २०२४ फेब्रुअरी २४ र २५ गते ६ सत्रमा अनलाइनमार्फत सञ्चालन भएको हो । कार्यक्रमका संयोजक तथा नेपाफका उपाध्यक्ष समेत रहेका सिएसआइआरओ एग्रिकल्चर एन्ड फुड, क्यानबेरा, अस्ट्रेलियामा कार्यरत डा. सीताराम घिमिरेले अनुसन्धान र अनुदान प्रस्ताव लेख्ने सत्रको साथ तालिमको सुरुवात गरेका थिए । यसपछि नेपाल कृषि अनुसन्धान परिषद्का वैज्ञानिक डा. रोशनबाबु ओझाले अनुसन्धान तथ्याङ्क विश्लेषण औजार र प्रविधिको खोजीको विषयमा तालिम प्रदान गरे। प्रयोगशालामा आधारित विश्लेषणात्मक अनुसन्धान गर्ने अन्तरदृष्टि सहित डा. एकिन्द्र तिमिल्सेनाले तालिमको पहिलो दिनको समापन गरेका थिए । नेपाफका अध्यक्ष समेत रहेका डा. तिमिल्सेना हाल सिएसआइआरओ एग्रिकल्चर एन्ड फुड मेलबर्नमा खाद्य वैज्ञानिकको रूपमा कार्यरत छन् ।
युनिभर्सिटी अफ सिड्नीका वरिष्ठ प्राद्यापक डा. केदार अधिकारीले फिल्ड एक्सपेरिमेन्टको डिजाइन र सञ्चालन सम्बन्धी सत्रबाट दोस्रो दिनको सुरुवात गरे।
इन्सिटटयुट फर स्टडी एन्ड डिभलपमेन्ट आइएफएसडी सिड्नीका लैंगिक समानता, अपाङ्गता र सामाजिक समावेशी नेतृत्व डा. बसुन्धरा भट्टराईले गुणात्मक अनुसन्धानमा केन्द्रित सामाजिक विज्ञान अनुसन्धानमा विशेष विधिहरूको बारेमा प्रकाश पारेकी थिइन् ।
अन्तमा, नेपाफका संस्थापक अध्यक्ष तथा आइएफएसडी सिड्नीका वरिष्ठ फेलो डा. जगदीश तिम्सिनाले वैज्ञानिक शोधपत्रको लेखन र प्रकाशनलाई सम्बोधन गर्दै कार्यक्रमको समापन गरेका थिए । तिम्सिना एनआरएनएको सीप, ज्ञान र आविष्कारको कृषि समितिको ग्लोबल अध्यक्ष समेत हुन्।
नेपाफको तालिम कार्यक्रमले सहभागी संकायहरुलाई ज्ञानको विस्तार ल्याउने, उनीहरुको अनुसन्धान क्षमता अभिवृद्धि गर्ने र अन्ततः कृषि, वन र वातावरणीय अध्ययनको क्षेत्रमा योगदान पु¥याउने अपेक्षा गरिएको छ । सुदूरपश्चिमाञ्चल विश्वविद्यालयको कृषि संकाय र नेपाली कृषि, वन तथा वातावरण अष्ट्रेलियाको संघ नेपाफबीचको साझेदारी दुई वर्षअघि एक समझदारी पत्र (एमओयू) मा औपचारिक रूपमा भएको थियो।
यस सहकार्यले ज्ञान हस्तान्तरण र विशेषज्ञता साझेदारी मार्फत संकाय सदस्यहरूको शैक्षिक र अनुसन्धान क्षमताहरू अभिवृद्धि गर्ने लक्ष्य राखेको नेपाफका अध्यक्ष डा. एकिन्द्र तिमिल्सेनाले बताए। तालिम उक्त साझेदारीको क्षेत्र मध्ये एक रहेको उनले बताए। एमओयूले विद्यार्थीहरूको सहपर्यवेक्षण, अनुसन्धान कोष सहयोग, र नयाँ विभागहरूको लागि पाठ्यक्रम विकास जस्ता संयुक्त प्रयासहरूलाई जोड दिन्छ। यो तालमेलले वैज्ञानिक अनुसन्धान र शैक्षिक गुणस्तरमा महत्वपूर्ण योगदान पुग्ने अपेक्षा गरिएको छ।
गत वर्षदेखि, नेपाफले दुई स्नातक विद्यार्थीहरूको अनुसन्धानलाई उनीहरूको अनुसन्धान गतिविधिहरूमा आंशिक रकम उपलब्ध गराएर सहयोग गर्दै आएको छ। तालिमको उद्घाटन सत्रमा नेपाल र अष्ट्रेलियाका ३६ शोधकर्ताहरुको सहभागिता रहेको थियो । उद्घाटन सत्रलाई कृषि तथा वनविज्ञान विश्वविद्यालयका उपकुलपति प्रा. डा. पुण्यप्रसाद रेग्मी र सुदूरपश्चिम विश्वविद्यालयका उपकुलपति प्रा डा अम्माराज जोशीले सम्बोधन गर्दै तालिमको पहलको महत्वमा जोड दिएका थिए । उनीहरूले नेपालमा प्रारम्भिक र मध्य करियर अनुसन्धानकर्ताहरूको क्षमता विकास गर्न यस्ता तालिमहरू अत्यन्त आवश्यक रहेकोमा जोड दिए। यसलाई राष्ट्रिय विकासमा डायस्पोरा नेपालीहरूको विशेषज्ञता र अनुभव साझा गर्ने अवसरको रुपमा लिइएको छ ।
